ਗਰਮੀਆਂ ਅਤੇ ਬਰਸਾਤਾਂ ਦੇ ਮੌਸਮ ਵਿਚ ਸਿਹਤਮੰਦ ਰਹਿਣ ਲਈ ਇਹ ਨਿਯਮ ਅਪਨਾਓ

ਟੱਟੀਆਂ, ਉਲਟੀਆਂ, ਪੇਚਸ ਅਤੇ ਪੀਲੀਏ ਤੋਂ ਬਚਣ ਲਈ

• ਪੀਣ ਦਾ ਪਾਣੀ ਹਮੇਸ਼ਾ ਸਾਫ ਸੋਮਿਆਂ ਤੋਂ ਲਿਆਓ।
• ਪਾਣੀ ਪੁਣਕੇ, ਉਬਾਲ ਕੇ – ਠੰਡਾ ਕਰਕੇ ਪੀਓ।
• ਪੀਣ ਦਾ ਪਾਣੀ ਸਾਫ ਭਾਂਡੇ ਵਿਚ ਢਕ ਕੇ ਰੱਖੋ ਅਤੇ ਪਾਣੀ ਵਾਲੇ ਭਾਂਡੇ ਵਿਚ ਹੱਥ ਨਾ ਪਾਓ।
• ਟੋਭਿਆਂ ਨੇਡ਼ੇ ਲੱਗੇ ਗੇਡ਼ਵੇਂ ਨਲਕਿਆਂ (ਹੈਂਡ ਪੰਪ) ਦਾ ਪਾਣੀ ਨਾ ਪੀਓ।
• ਪਰਿਵਾਰ ਦੇ ਸਾਰੇ ਮੈਂਬਰ ਸਿਰਫ ਪਖਾਨਿਆਂ ਦੀ ਵਰਤੋਂ ਕਰਨ, ਖੁਲ੍ਹੇ ਮਦਾਨ ਵਿਚ ਜੰਗਲ ਪਾਣੀ ਨਾ ਜਾਣ।
• ਪ੍ਰਤੀਦਿਨ ਖਾਣਾ ਖਾਣ ਤੋਂ ਪਹਿਲਾਂ, ਪਖਾਨਾ ਜਾਣ ਤੋਂ ਬਾਅਦ, ਹੱਥ  ਸਾਬਣ ਨਾਲ ਚੰਗੀ ਤਰ੍ਹਾਂ ਧੋਵੋ।
• ਗਲੇ-ਸਡ਼ੇ, ਜਿਆਦਾ ਪੱਕੇ ਹੋਏ ਅਤੇ ਕੱਟੇ ਹੋਏ ਫਲ ਨਾ ਖਾਓ।
• ਕੀਟਨਾਸ਼ਕਾਂ ਦੇ ਡਰੱਮਾਂ, ਡੱਬਿਆਂ ਨੂੰ ਨਹਿਰਾਂ/ਟੋਭਿਆਂ ਵਿਚ ਨਾ ਧੋਵੋ। ਇਸ ਤਰ੍ਹਾਂ ਕੀਟ-ਨਾਸ਼ਕਾਂ ਦੇ ਜਹਿਰੀਲੇ ਤੱਤ ਪਾਣੀ ਵਿਚ ਰਲਕੇ ਪਾਣੀ ਨੂੰ ਮਨੁੱਖਾਂ ਅਤੇ ਜੀਵ-ਜੰਤੂਆਂ ਲਈ ਨੁਕਸਾਨਦੇਹ ਬਣਾ ਦਿੰਦੇ ਹਨ।
• ਸਬਜੀਆਂ ਨੂੰ ਟੋਭਿਆਂ, ਛੱਪਡ਼ਾਂ ਅਤੇ ਨਾਲਿਆਂ ਦੇ ਪਾਣੀ ਨਾਲ ਨਾ ਧੋਵੋ।

ਜੇਕਰ ਤੁਹਾਡੇ ਪਰਿਵਾਰ, ਆਂਢ-ਗੁਆਂਢ ਜਾਂ ਇਲਾਕੇ ਦੇ ਕਿਸੇ ਵਿਅਕਤੀ ਨੂੰ ਟੱਟੀਆਂ-ਉਲਟੀਆਂ ਜਾਂ ਪੇਚਿਸ ਦੀ ਸ਼ਿਕਾਇਤ ਹੋਵੇ ਤਾਂ ਤੁਰੰਤ ਨੇਡ਼ੇ ਦੇ ਸਿਹਤ ਕੇਂਦਰ ਨਾਲ ਸੰਪਰਕ ਕਰੋ।

ਪਾਣੀ ਨੂੰ ਪਾਣਯੋਗ ਬਣਾਉਣ ਲਈ ਨੇਡ਼ੇ ਦੀ ਸਿਹਤ ਸੰਸਥਾ ਜਾਂ ਮਿਉਂਸਪਲ ਕਮੇਟੀ/ਕਾਰਪੋਰੇਸ਼ਨ ਦੇ ਦਫਤਰ ਤੋਂ ਕਲੋਰੀਨ ਦੀਆਂ ਮੁਫਤ ਗੋਲੀਆਂ ਪ੍ਰਾਪਤ ਕਰੋ।

ਸਿਹਤ ਅਤੇ ਪਰਿਵਾਰ ਭਲਾਈ ਵਿਭਾਗ, ਪੰਜਾਬ