ਤੇਰੀ ਯਾਦ ਆਈ ਸਵੇਰੇ ਸਵੇਰੇ
ਡਾ. ਸਰਬਜੀਤ ਕੌਰ ਸੰਧਾਵਾਲੀਆ
ਖੁਸ਼ੀ ਥਰਥਰਾਈ ਸਵੇਰੇ ਸਵੇਰੇ
ਕਲੀ ਮੁਸਕਰਾਈ ਸਵੇਰੇ ਸਵੇਰੇ
ਅਜੇ ਨੈਣ ਖੋਲ੍ਹੇ ਹੀ ਸਨ ਕਿ ਅਚਾਨਕ
ਤੇਰੀ ਯਾਦ ਆਈ ਸਵੇਰੇ ਸਵੇਰੇ
ਲਹੂ ਗੇੜ ਨੇ ਐਸੇ ਖਾਧੇ ਉਛਾਲੇ
ਨਬਜ਼ ਕੰਪਕਪਾਈ ਸਵੇਰੇ ਸਵੇਰੇ
ਤੇਰੇ ਨਾਮ ਨੂੰ ਪਰਸਿਆ ਬੁਲ੍ਹੀਆਂ ਨੇ
ਰਿਦੇ ਪੈਲ ਪਾਈ ਸਵੇਰੇ ਸਵੇਰੇ
ਪਪੀਹੇ ਦੀ ਪੀ ਪੀ ਤੇ ਕੋਇਲ ਦੀ ਕੂ ਕੂ
ਹੈ ਕੰਨਾਂ ਨੂੰ ਭਾਈ ਸਵੇਰੇ ਸਵੇਰੇ
ਛਿੜੀ ਗੁਫ਼ਤਗੂ ਹੈ ਤੇਰੀ ਪੰਛੀਆਂ ਵਿਚ
ਹਵਾ ਗੁਣਗੁਣਾਈ ਸਵੇਰੇ ਸਵੇਰੇ
ਮਹੀਲ ਮਾੜੀਆਂ ਕੁੱਲੀਆਂ ਬਸਤੀਆਂ ਵਿਚ
ਖ਼ੁਮਾਰੀ ਹੈ ਛਾਈ ਸਵੇਰੇ ਸਵੇਰੇ
ਹੋਈ ਬਾਂਸਰੀ ਮੇਰੇ ਸਾਹਾਂ ਦੀ ਸਰਗਮ
ਕੀ ਮਦਿਰਾ ਪਿਲਾਈ ਸਵੇਰੇ ਸਵੇਰੇ
ਜੋ ਮੱਥੇ ‘ਚ ਚੜ੍ਹਿਆ ਤੇਰੇ ਨਾਂ ਦਾ ਸੂਰਜ
ਹੈ ਧੁੱਪ ਖਿਲਖਿਲਾਈ ਸਵੇਰੇ ਸਵੇਰੇ
