ਸਾਡਾ ਮਾਲਕ ਜਨਾਬ ਵੀ ਤੂੰ ਹੈਂ
ਡਾ. ਸਰਬਜੀਤ ਕੌਰ ਸੰਧਾਵਾਲੀਆ
ਤੂੰ ਹੀ ਬੁਲਬੁਲ ਗੁਲਾਬ ਵੀ ਤੂੰ ਹੀ ਹੈਂ
ਹੁਸਨ ਵੀ ਤੂੰ ਸ਼ਬਾਬ ਵੀ ਤੂੰ ਹੈਂ
ਤੂੰ ਹੀ ਆਸ਼ਕ ਮਾਸ਼ੂਕ ਵੀ ਤੂੰ ਹੀ
ਪਿਆਰ ਭਰਿਆ ਚਨਾਬ ਵੀ ਤੂੰ ਹੈਂ
ਤੂੰ ਹੀ ਨਗ਼ਮਾ ਹੈਂ ਰਾਗ ਵੀ ਤੂੰ ਹੀ
ਨਾਦ ਵੀ ਤੂੰ ਰਬਾਬ ਵੀ ਤੂੰ ਹੈਂ
ਤੂੰ ਇਬਾਰਤ ਹੈਂ ਕਲਮ ਵੀ ਤੂੰ ਹੀ
ਜ਼ਿੰਦਗੀ ਦੀ ਕਿਤਾਬ ਵੀ ਤੂੰ ਹੈਂ
ਤੂੰ ਤਸੱਵਰ ਹੈਂ ਹਕੀਕਤ ਵੀ ਤੂੰ ਹੈਂ
ਖ਼ੂਬਸੂਰਤ ਖਵਾਬ ਵੀ ਤੂੰ ਹੈਂ
ਤੂੰ ਹੀ ਡੁਲ੍ਹਕੇ ਸਿਤਾਰਿਆਂ ਅੰਦਰ
ਚੰਨ ਵੀ ਆਫ਼ਤਾਬ ਵੀ ਤੂੰ ਹੈਂ
ਮੌਤ ਕੀ ਹੈ ਤੇ ਜ਼ਿੰਦਗੀ ਕੀ ਹੈ
ਏਸ ਸਭ ਦਾ ਜਵਾਬ ਵੀ ਤੂੰ ਹੈਂ
ਤੇਰੇ ਸ਼ੁਕਰਾਨਿਆਂ ਚ ਭਰ ਆਏ
ਮੇਰੇ ਨੈਣਾਂ ਦੀ ਆਬ ਵੀ ਤੂੰ ਹੈਂ
ਆਜਿਜ਼ਾਂ ਨੂੰ ਤੂੰ ਮਰਤਬੇ ਬਖ਼ਸ਼ੇਂ
ਬੇਕਸਾਂ ਦਾ ਖਿਤਾਬ ਵੀ ਤੂੰ ਹੈਂ
ਖ਼ਾਕ ਦੀਆਂ ਪੁਤਲੀਆਂ ਦੀ ਕੀ ਹਸਤੀ
ਸਾਡਾ ਮਾਲਕ ਜਨਾਬ ਵੀ ਤੂੰ ਹੈਂ
